Panaderías Acuña ten previsto trasladarse ao polígono de Barro. Así llo comunicou o seu copropietario, Andrés Acuña Blanco, ao alcalde do municipio, Xosé Manuel Fernández Abraldes, na xuntanza que ambos mantiveron por este asunto.
A empresa prevé iniciar a construción das súas novas instalacións na primavera de 2020 e escolleu asentarse en Barro pola súa localización estratéxica.
Para iso, avanza a compañía, teñen decidido comprar unha parcela no próximo concurso público da Deputación de Pontevedra.
Nestas instalacións traballarán entre 50 e 60 persoas e apostarán, dentro do posible, pola incorporación de persoal da zona de Barro.
O alcalde, con quen xa mantiveran conversas hai meses para estudar as posibilidades deste traslado, manifestoulle o seu agradecemento por ter apostado finalmente por Barro para asentar a súa empresa e transmitiulle que desde a institución municipal farán todo o posible para axilizar toda a tramitación administrativa.
Fernández Abraldes destaca que a creación de postos de traballo e a dinamización da actividade económica "é unha prioridade para nós", xa que considera "fundamental" promover a actividade económica local e dar facilidades para o asentamento de novas empresas nos seus polígonos.