O avogado Jesús Santaló, encargado da defensa de Julio Araújo, o único imputado no caso da desaparición de Sonia Iglesias, acudiu ao Xulgado de Violencia de xénero no edificio da Parda para revisar os vídeos das cámaras de gravación de seguridade, que forman parte da investigación xudicial, para comprobar que espazos cubrían os obxectivos desas cámaras e ver se podía extraerse algunha nova achega neste caso. Non foi así. Santaló sinalaba que os vídeos carecen de valor xudicial e neles non se observa ningún dato significativo.
O propio avogado da defensa solicitara este visionado. Segundo apuntou, a cámara da rúa Oliva non cobre nin o 10% da zona e non se pode comprobar a veracidade da testemuña que afirmou ter visto a Sonia Iglesias camiñando por esa rúa o día da súa desaparición. Nas imaxes nin sequera se chega a observar a presenza da testemuña, segundo Jesús Santaló.
Un resultado similar sucede no caso do vídeo da Comandancia da Garda Civil. A perspectiva só cobre o acceso á rotonda que procede do Centro Comercial da Barca e tampouco se chega a ver o coche que lanzou a carteira que foi encontrada nas proximidades do Vao.
O próximo 18 de agosto cumpriranse catro anos da desaparición da muller pontevedresa e o avogado da defensa entende que non existen motivos para manter a imputación de Julio Araújo, parella de Sonia Iglesias.