Representantes sindicais de Alternativas na Xustiza-CUT e STAJ están citados este martes día 26 ás 10.30 horas para declarar ante a Fiscalía de Pontevedra en calidade de investigados por supostas coaccións durante a folga da xustiza, feitos que vincularon a unha "caza de bruxas" por parte da Xunta e a Fiscalía.
Segundo explicaron os afectados, a investigación xurdiu a partir dunha denuncia ante o Tribunal Superior de Xustiza de Galicia presentada por un delegado de Ourense do sindicato SPJ-USO por supostas coaccións o día da votación do acordo. O tribunal remitiu á Fiscalía de Pontevedra a denuncia, que afecta a Enrique Araújo (de STAJ), Fina Iglesias e Pablo Valeiras (ambos de AXG- CUT).
Despois de celebrar unha asemblea de traballadores este luns na Audiencia de Pontevedra estes tres procesados pola Fiscalía denuncian que o vicepresidente da Xunta, Alfonso Rueda, é o promotor da acusacións en "represalia" por unha folga que consideran "exemplar" para outros operarios públicos.
Fina Iglesias cre que esta investigación pretende "calarnos a boca" e asegurou que os funcionarios rexeitaron o acordo cos seus votos "porque catro sindicatos traizoaron a todos os traballadores", unha reacción do colectivo que considera "lóxica" ante a "indignación" acumulada desde o inicio da folga. "O que se votou foi a dignidade", engadiu.
Pola súa banda, Pablo Valeiras denunciou unha campaña de "represión sindical" da que acusa en primeiro lugar a Alfonso Rueda e tamén á Fiscalía por "utilizar politicamente a institución" e ao sindicato SPJ-USO como "pilar necesario para encubrir ao vicepresidente" e con iso "demostrar que calquera que se mova contra o réxime ten un problema".
Enrique Araújo tamén sinalou á "amizade manifesta" do fiscal xefe, Juan Carlos Aladro, e o vicepresidente, Alfonso Rueda "que lle marca o camiño" para aplicar a lei mordaza e evitar que a folga na administración de xustiza galega fose un "exemplo" para as reivindicacións doutros traballadores.
Para este martes esta convocada unha concentración de apoio ante o edificio dos xulgados da Parda coincidindo coas comparecencias destes tres sindicalistas ante a Fiscalía.