As 74 novas vivendas de promoción pública que promove a Xunta de Galicia na rúa Prado Novo, no barrio pontevedrés de Valdecorvos, xa están en obras e está previsto que estean rematadas a finais de 2025 ou, "como moi tarde", no primeiro trimestre de 2026.
O presidente da Xunta, Alfonso Rueda; a conselleira de Vivenda e Planificación de Infraestruturas, María Martínez Allegue; e o alcalde de Pontevedra, Miguel Anxo Fernández Lores, visitaron este martes a zona con motivo do inicio das obras e deron mostra de boa sintonía entre os gobernos local e autonómico no relativo ao impulso de vivenda de promoción pública, con intercambio de agradecemento entre administracións.
A visita permitiu coñecer novos detalles sobre este proxecto, do que a conselleira Martínez Allegue sinalou que vai dar prioridade á persoas menores de 36 anos. Así, a metade das 74 novas vivendas vanse reservar para este colectivo.
O proxecto supón un investimento de 14,2 millóns de euros para a construción de 74 vivendas distribuídas en catro bloques de 6 pisos con prazas de aparcamento, zonas verdes e paneis solares. Serán para aluguer e venda e cumprirán criterios de sustentabilidade e eficiencia enerxética. Lucas Diaz Sierra, de Diaz y Diaz Arquitectos, destacou que haberá 74 vivendas 174 prazas de garaxe e 74 rochos.
Martínez Allegue destacou que esta obra suporá "un proxecto de futuro para 74 familias" e Alfonso Rueda sinalou a importancia deste tipo de proxectos para "pasiño a pasiño" contribuír a dar resposta a un dos grandes problemas que hai na actualidade, a falta de vivendas. De feito, recordou o compromiso do seu Goberno para "dobrar o parque público de vivenda en Galicia".
Para cumprir ese compromiso, Rueda destacou que teñen intención de "facer todas as que poidamos onde se nos dean facilidades e aquí en Pontevedra se nos están a dar". Destacou, así, a colaboración do Concello en canto a dispoñibilidade de terreo e a axilización na tramitación das licenzas. "Todo iso contribúe a facer cidade e a mellorar a vida da xente", sinalou.
Xusto antes, Lores amosara esa boa sintonía entre administracións dando os seus "parabéns" á Consellería de Vivenda por adxudicar esta obra para dar resposta á "necesidade de vivenda pública" que se acumulara na cidade desde que en 2016 se inaugurou o último polígono tamén en Valdecorvos.
O alcalde lembrou que a falta de vivenda é "un problema realmente complexo" que se vive en toda España e Galicia e tamén en Pontevedra e asegurou que o Concello seguirá ofrecendo "todas as facilidades do mundo" para a construción de vivenda pública e obras doutras administracións. Insiste , iso si, en que sexan proxectos situados, como moi lonxe, a 1,5 quilómetros das praza da Peregrina, dentro do seu modelo de "facer unha cidade compacta".
Nesta liña, os representantes do Concello e da Xunta sinalaron este martes que tres das parcelas cedidas polo Concello para vivendas con algún tipo de protección xa foron aceptadas, unha en Valdecorvos e outras en Tafisa e na Parda.
Alfonso Rueda coincidiu con Lores en que a ausencia de vivenda é "un problema fundamental a día de hoxe" e destacou o seu compromiso para a construción de 375 inmobles protexidos nos primeiros 100 días de goberno e de pasar de 4.000 vivendas actuais a 8.000 en 2028.