As novas demandas de atención social derivadas da pandemia do coronavirus fixéronse notar tamén no Centro de Atención Social Continuada de Rexurdir Provincial, que desde o inicio do estado de alarma está a ofrecer asistencia a unha media de 30 usuarios diarios.
O servizo, financiado pola Concellería de Benestar Social, adaptouse ás novas demandas motivadas pola pandemia, pasando de atender ao habitual perfil de drogodependentes crónicos de substancias duras a centrarse en dar resposta ás necesidades de todas aquelas persoas de Pontevedra que, por mor das consecuencias socioeconómicas da pandemia, se atopan actualmente en situación de vulnerabilidade ou exclusión social.
O centro de Rexurdir na cidade pasou a dar almorzos, facer reparto de alimentos e ofrecer un servizo de roupeiro, aseo, ducha e lavandería.
A concelleira de Benestar Social, Paloma Castro, explicou que ademais dos usuarios habituais, nas últimas semanas detectouse a asistencia a este centro de usuarios cun novo perfil, persoas que se viron prexudicadas por ERTE ou pola non renovación dos seus contratos de traballo, que acabaron nunha situación que non podían imaxinar e que tiveron que recorrer a este servizo para alimentarse e manter unhas condicións de limpeza e hixiene aceptables.
Segundo indicou Paloma Castro, ata o momento non se rexistrou ningún contaxio no interior do Centro, "algo que se debeu en gran medida ao plan de continxencia que a institución elaborou tras o decreto do estado de alarma e que todo o persoal cumpriu estritamente".
A maior parte dos usuarios responden a un mesmo perfil: non ter documentación; carecer de acceso á rede sanitaria; non dispor de ingresos económicos, ter ingresos inestables e insuficientes ou contar con ingresos procedentes de axudas sociais; carecer de fogar e ter grandes dificultades para acceder a unha vivenda digna (ou no caso de tela, con moi malas condicións de habitabilidade); padecer enfermidades físicas e/ou mentais de longa evolución, e consumir abusivamente drogas (heroína ou haxix), alcohol e medicación non prescrita. Todos teñen por regra xeral ás súas costas máis dun tratamento de desintoxicación.
Ademais, hai moitos usuarios en proceso de incapacitación ou xa incapacitados; outros son estranxeiros cunha longa traxectoria de exclusión en varios países e moi reticentes a achegarse aos servizos sociais e sanitarios da cidade; pertencen a minorías étnicas, principalmente a xitana; carecen de soporte familiar e social (ou se existe, é moi fráxil), teñen unha formación básica, desfasada ou mesmo nula, e presentan problemas xudiciais e déficits no coidado persoal.
A concelleira de Benestar Social explica que todas estas características fan pensar nun perfil tipo dun varón que leva xa un longo tempo na rúa, que pide cartos, aparca coches ou cobra algún tipo de prestación, cun nivel formativo escaso ou nulo e que, normalmente, vive en moi malas condicións en casas okupas compartidas ou na mesma rúa.
CONVENIO ALBERGUE SAN JAVIER
Por outra banda, Paloma Castro anunciou este sábado que levará o luns a Xunta de Goberno local un convenio de colaboración entre o Concello de Pontevedra e Cáritas Interparroquial para o desenvolvemento do servizo de aloxamento temporal de persoas sen fogar e en situación de emerxencia social no albergue de San Javier (situado na rúa Irlanda, en Monte Porreiro).
En base a este acordo, a Administración municipal destinará este ano unha achega económica de 31.000 euros a esta liña de cooperación entre a institución e a área de Servizos Sociais, que inclúe estadía, almorzo e cea por un período limitado de tempo.