Responsables da comunidade de montes de San Xulián de Marín denunciaron ante a Policía Nacional o roubo de seis cabras ananas, tres delas crías, nun recinto pechado no Lago de Castiñeiras.
A finais de xullo detectaron a desaparición de tres crías, ás que se sumaron outros tres exemplares adultos. Comprobaron que o valo metálico de arame fora forzada coa utilización dalgunha ferramenta para acceder ao espazo no que se atopaban.
Adrián Arias, directivo da comunidade de montes, entende que se realizou durante a noite porque ao longo do día adoita haber persoas por esa zona. Entende tamén que os autores desta acción "non poden estar moi lonxe" facendo referencia a que deben ser da contorna.
Calculan que a perda ascende a máis de 600 euros coa desaparición destes animais que eran utilizados para limpar de maleza zonas do monte.
Agora, o recinto quedou con tan só dous exemplares adultos e unha cría, filla dunha das cabras roubadas, que é coidada por persoal da asociación Xoán XXIII.
Adrián Arias recoñece que a comunidade de montes estuda a posibilidade de instalar algún sistema de vixilancia a través de cámaras ou coa presenza de cans para evitar novos incidentes. Lembra que o Lago de Castiñeiras é un espazo referencial e lamenta que, nos últimos tempos, converteuse nun espazo onde se suceden actividades vandálicas como o roubo de grellas nos asadores instalados ou danos nos bancos.
A Policía Nacional de Marín tamén lles indicou que tentarán incrementar a vixilancia na zona, aínda que a directiva de San Xulián recoñece que será difícil recuperar ás cabras e contempla a posibilidade de que permanezan nalgún domicilio particular ou mesmo que fosen xa vendidas a través de internet.