O delegado do Goberno en Galicia, Javier Losada, informou que este mércores houbo 325 dispositivos de seguridade que alcanzaron a 6.725 persoas e 4.572 vehículos na Comunidade.
A Garda Civil e a Policía Nacional sumaron 83 propostas de sanción, pouco máis dun 1% do total.
A xornada do mércores tivo 2.077 persoas identificadas por parte da Policía Nacional e 4.648 pola Garda Civil. En canto a vehículos, a Policía controlou 838, mentres que o Instituto Armado fixo o mesmo con 3.734.
En total, entre Garda Civil e Policía Nacional realizaron 325 dispositivos de seguridade. Houbo 29 propostas de sanción da Policía e 54 da Garda Civil ao longo do día.
A Garda Civil realizou onte un dispositivo especial no límite entre Galicia e Castela e León na autovía A-6. O obxectivo é controlar a mobilidade entre comunidades autónomas dado que Galicia atópase pechada, salvo desprazamento por causa xustificada. Foron controlados uns 3.000 vehículos e unhas 3.500 persoas no punto.
Estes datos suman desde o pasado luns, día 21 de decembro, 5.067 dispositivos de seguridade que alcanzaron a 43.940 persoas e 26.796 vehículos. Acumulan entre ambos os corpos 1.313 propostas de sanción, menos dun 3% do total.
Javier Losada destacou que as Forzas e Corpos de Seguridade do Estado "continúan a súa intensa actividade fronte á pandemia". Ademais, incidiu na importancia de continúe a responsabilidade individual diante da próxima celebración do Ano Novo.
Nese sentido, volveu a facer un chamamento "para que a actitude da poboación continúe como ata o de agora, con especial coidado nuns momentos de reunións familiares nos que a pandemia da covid-19 constitúe un importante risco".
O delegado do Goberno subliña que "é necesario actuar con cautela e seguir as indicacións facilitadas polas Forzas e Corpos de Seguridade do Estado". Na actualidade, estas reforzan e continuarán reforzando a vixilancia en áreas de aglomeración de persoas, así como en zonas de lecer e restauración.
Javier Losada lembrou que tanto a Policía Nacional como a Garda Civil traballan para garantir o cumprimento das restricións impostas pola Xunta. Incidiu na máxima colaboración que presta a Delegación do Goberno á Administración autonómica, plasmada a semana pasada na reunión de coordinación co presidente, Alberto Núñez Feijóo.