A Misión Biolóxica de Galicia acolleu este venres en Pontevedra unha xornada de presentación técnica dun proxecto de I+D.
A presentación do Grupo Operativo "Oliveiras de Galicia para multiplicación a gran escala de oliveira autóctona" estivo arroupada por unhas cincuenta persoas, entre profesionais do sector, investigadores e particulares de toda Galicia que xa manifestaron o seu interese por cultivar oliveiras autóctonas.
O Centro Superior de Investigacións Científicas (CSIC) iniciou fai algo máis dunha década unha liña de investigación sobre as variedades de oliveira existentes en Galicia. Desde 2017, os traballos desenvolvéronse coa colaboración, fundamentalmente, da Fundación Juana de Vega, dando como resultado a identificación e descrición unhas 20 variedades autóctonas, a aprobación de 2 delas (Brava galega e Mansa galega) como variedades de conservación e o inicio do rexistro comercial de 11.
O Grupo Operativo, que desenvolverá o seu labor ata 2026, busca optimizar de forma paralela dous sistemas de multiplicación: estaquillado clásico e microestaquillado in vitro. Os seus resultados permitirán, por tanto, prover de plantas aos viveiros para que estes á súa vez poden cubrir a alta demanda actual de oliveira autóctona.
Ademais pretenden transferir os resultados a olivareros e viveristas para que tamén colaboren na recuperación destas variedades tradicionais, coñézanas e trasladen a información ao longo da cadea de valor.
Todo iso redundará na consolidación e crecemento dun sector económico ligado á oliveira, que pode servir para desenvolver unha produción e unha industria rendible en amplas zonas do territorio galego.