O ex alcalde da Lama Jorge Canda e outras seis persoas son obxecto dunha investigación xudicial polas presuntas irregularidades do proceso para cubrir unha praza de auxiliar bibliotecario municipal. Investígase se poden ser responsables dun delito de tráfico de influencias.
O Xulgado de Instrución número 2 de Pontevedra revisou a denuncia presentada en relación coa polémica oposición convocada polo Concello da Lama, na que o responsable de prensa do goberno local, Antón Xil, arrebatou a praza á profesional que levaba 23 anos no posto, Cristina Villaverde Ruibal.
Cristina Villaverde levou o caso aos tribunais e, tras estudalo, o xulgado conclúe que os feitos "presentan características que fan presumir a posible existencia de delito de tráfico de influencias".
Ademais, nun auto ao que tivo acceso PontevedraViva, o xuíz pide seguir investigando e ordena remitir un oficio ao Concello da Lama para que informe "sobre a motivación da nota de opositor e que procedan a comunicar a xustificación dos criterios seguidos para a puntuación na oposición".
O xuíz considera "procedente" incoar dilixencias previas e practicar aquelas esenciais encamiñadas a efectuar se estes feitos son delito e, no seu caso, que xulgado debe revisalos.
Cristina Villaverde denunciou este proceso desde o principio e decidiu chegar ao xulgado despois de coñecerse as notas, nas que Antón Xil Alcántara, responsable de comunicación na Lama e candidato do PP en Ponte Caldelas, obtivo un 6,275 e ela un 0.
Esta muller denuncia que o proceso está viciado e organizouse de tal forma que puidesen "colocar" a un asesor do PP.
Tamén o PSOE e o sindicato CXT se sumaron ás críticas en 2023, ao coñecerse a puntuación. CXT cualificou a oposición de"irregular desde o minuto uno" para "favorecer que o posto o levase" o asesor do PP.