Traballo de oficina, cancelacións e sen atención ao público. A pesar de que a desescalada xa permite a súa reapertura, as axencias de viaxe de Pontevedra permanecen coa reixa baixada.
No seu interior, os propietarios ultiman o regreso, que estiman será ao redor do 15 de xuño, preocupados porque "quen vai querer viaxar este verán?", pregúntanse nun local da rúa Rosalía de Castro dando por perdido o ano.
"Agora mesmo non vemos moito interese en organizar viaxes", recoñecen noutra axencia na que o teléfono só soa para suspender as excursións planificadas antes da pandemia. "Estamos a facer traballo de oficina e sobre todo xestionando cancelacións", lamentan.
A decisión de permitir o turismo para partir do mes de xullo e a promoción do turismo nacional supón un halo de esperanza para este sector, pero as expectativas non son nada positivas.
De feito, algunhas cadeas teñen pensado regresar á actividade con horario de media xornada e menos persoal.