A Sala do Contencioso do Tribunal Superior de Xustiza de Galicia (TSXG) desestima un recurso de apelación para a protección de dereitos fundamentais presentado por un regatista desconforme coa resolución do Comité de Protestas da I Regata Interclubes da Ría de Pontevedra, celebrada en 2015, na que sancionou ao deportista.
A Sala da Sección Primeira conclúe que "o demandante non dubidou en participar na regata lucindo na súa embarcación o lema 'Non Celulosas', expresión claramente reivindicativa, con evidente finalidade social, política e ambiental, buscando un efecto propagandístico e publicitario tendente a influír no ánimo dunha colectividade xa sensibilizada pola estreita ligazón entre esa actividade e a empresa ENCE que a exerce en Pontevedra".
O alto tribunal entende que nada impide que o actor poida manifestar a súa opinión respecto diso, pero o que si se veta é que o faga "aproveitando unha competición deportiva cuxas específicas regras prohiben ese tipo de actitudes".
Os maxistrados do TSXG indican que o demandante tiña o "deber" de coñecer as normas reguladoras da proba e aclara que o demandante tiña a "carga" de someter aos organizadores, antes do inicio da proba, "os termos da publicidade pretendida dado que ostensiblemente non era publicidade inocua ou comercial".
En cambio, considera que o regatista optou por "os feitos consumados a propósito do seu potencial impacto alleo á esencia da competición deportiva".
O regatista pode interpoñer recurso de casación contra este fallo.