O PSOE de Marín, liderado por Manuel Pazos, esixe que seestude a posibilidade de que o aparcamento do Eguren sexa xestionado polo Concello en lugar de cedelo a unha empresa privada. Pazos sinala que as contas do proxecto "non cadran" e, en liña co Consello de Contas, suxire que "a xestión municipal sería máis rendible para a localidade".
Os socialistas poñen de exemplo o modelo concesional do Hospital Álvaro Cunqueiro de Vigo, onde se expón un sobrecusto de 470 millóns de euros debido á privatización e indícase que non houbo un estudo rigoroso para optar por este modelo.
Neste sentido, o PSOE advirte que en Marín poderíase estar a cometer o mesmo erro e, para evidenciar estas dúbidas, expón que o proxecto do aparcamento ten un custo de 4,2 millóns de euros, dos cales o Concello pagaría 3,5 millóns ao concesionario durante 40 anos. Estiman, ademais, que os ingresos polo uso do aparcamento poderían alcanzar os 17 millóns, catro veces máis que o seu custo, pero, segundo os socialistas, "os cálculos financeiros non teñen xustificación técnica".
É por iso que o PSOE afirma que Marín ten capacidade económica para asumir o proxecto directamente, mesmo sen axudas externas, e así xerar ingresos adicionais para o Concello, polo que instan o goberno local, liderado por María Ramallo, a considerar esta opción.