O PP de Pontevedra solicita ao Goberno local a "recolocación inmediata" de todos os concelleiros do partido e dos empregados públicos afectados polas obras que comezaron nos últimos días no edificio municipal do número 30 da rúa Michelena ao considerar que traballando no seu espazo actual non se atopan en condicións de seguridade e salubridade.
"Non se cumpren as condicións de seguridade e salubridade", sostén o presidente do Partido Popular de Pontevedra, Rafa Domínguez, que decidiu que ata que se asegure a situación os edís non continuarán realizando as súas funcións nas dependencias municipais e traballarán desde a sede do PP na rúa Palamios.
Segundo denuncia o PP, os concelleiros mediron cun sonómetro o volume desprendido das obras e superaban os 100 decibeis, case o dobre do límite permitido por lei.
Ademais, mostran a súa preocupación polo desprendemento de cascotes, algúns dun tamaño o suficientemente grande como para ferir a unha persoa considerablemente, e que poñen en perigo a integridade dos concelleiros e dos empregados públicos.
Domínguez considera fundamental que de maneira urxente o Concello garanta a salubridade e seguridade dos empregados públicos e dos concelleiros do PP, pois "non podemos permitir nin un segundo máis esta situación do todo inxustificada e inhumana".
Ademais, critica unha falta de previsión "sanguenta" por parte do Goberno local.