Unha pasarela de madeira integrada na paisaxe que permite ter unha espectacular vista da cidade de Pontevedra. É o que ofrece o novo miradoiro que o Concello de Pontevedra vén de habilitar no parque forestal da Fracha, un dos pulmóns verdes do municipio.
O miradoiro, que está situado na área de lecer de Rega Pereira, en Tomeza, foi posible tras un investimento de case 17.000 euros, que executou a empresa Xardinor SL.
Esta actuación formou parte dunha serie de labores de mellora e acondicionamento de todo o parque, un dos tres que ten Pontevedra xunto co da Tomba e o Pontillón do Castro.
Os tres parques contan cunha brigada de mantemento ao longo de todo o ano que fundamentalmente realiza traballos de control da vexetación e eliminación de especies invasoras nos tres parques da cidade.
Estes traballos están a ser realizados pola empresa EIL Cormo Integral, logo de gañar a adxudicación do contrato no ano 2022.
O alcalde, Miguel Anxo Fernández Lores, visitou os distintos traballos que se foron realizando e animou a toda a veciñanza a pasear por estes parques e facer algún dos roteiros sinalizados para fomentar hábitos saudables e coñecer o patrimonio natural do municipio.