Ocentro de arte rupestre de Campo Lameiro opta ao Premio Internacional AR&PA de Intervención no Patrimonio Cultural. Terá que enfrontarse a outros sete proxectos de diversos países.
Os rivais que tamén figuran como candidatos son a Cámara Santa da catedral de Oviedo o proxecto de recuperación do teatro romano de Clunia, en Burgos, a intervención dentro dun complexo arqueolóxico dos Mercados de Trajano, en Roma, a remodelación do Museo Arqueolóxico nacional, o proxecto de recuperación do submarino de Peral, o convento de Vilar Frades e a restauración da catedral de Tarazona. Os proxectos foron seleccionados entre un total de 25 propostas.
O director do Parque Arqueolóxico de Campo Lameiro (PAAR), José Manuel Rey, expón na tarde deste venres a candidatura ante o xurado do premio no Auditorio Miguel Delibes de Valladolid. O gañador deste galardón coñecerase o sábado 15 de novembro no marco da IX Bienal de Restauración e Xestión do Patrimonio.
O PAAR é un proxecto cultural creado pola Xunta de Galicia co obxectivo de xerar un modelo para a conservación, investigación e difusión dos petroglifos de Galicia.