A plataforma Pontevedra de Noite, constituída no ano 2023, alerta de que o sector do lecer nocturno na cidade está "en risco de desaparición" e reclama solucións para que os propietarios deste tipo de negocios non teñan que "baixar a persiana".
Aseguran que "en ningún caso" esta plataforma pediu "barra libre" de licenzas. O que reclamaron, segundo aseguran nun comunicado, é que se tomasen as medidas necesarias para protexer "as xa poucas licenzas de lecer nocturno que quedan".
Isto pasaría, segundo defende o sector, por unha igualdade co resto de negocios da cidade, "que non é outra máis que poder adaptarnos á normativa e ao plano orixinal e continuar coa actividade para a cal temos licenza".
A plataforma afirma estar "en total sintonía" con mellorar as condicións de seguridade, insonorización e accesibilidade "ou todo aquilo que poida ir en beneficio dos veciños e clientes para lograr a harmonía e convivencia que se reclama e na que nós tamén cremos".
"Desgraciadamente ata o momento non parece atoparse outra solución máis que facer baixar a persiana a veciños que co seu diñeiro e esforzo contribuíron da mellor maneira posible a dinamizar a zona e empregar a moitos pontevedreses durante anos", lamentan.
O problema radica, sosteñen os representantes do lecer nocturno, "na imposibilidade de adaptar ou actualizar os nosos locais daquelas imperfeccións que co tempo puidesen ter", para o que instan a que se adopten as medidas pertinentes.
A plataforma lamenta ademais a vinculación que se fixo dos seus negocios con "temas tan graves" como o consumo de heroína ou a inseguridade cidadá.
Defenden que a chegada da actual hostalería foi a que deu unha "nova vida e imaxe" ao centro histórico "erradicando eses problemas antes mencionados". É a mesma zona monumental, denuncian, "na que hoxe 25 anos despois parece que a algúns lles sobra o noso sector".