Ata os 681.000 euros ascenderán finalmente as obras que Paradores do Estado realizará na Casa do Barón, o Parador de Pontevedra. É unha actuación que, tras recibir a licenza municipal, poderán comezarán nos próximos días.
A portavoz do goberno municipal, Anabel Gulías, informou este luns que previamente ao comezo destes traballos a directora do Parador, Meritxell Marcos, mantivo unha reunión co alcalde de Pontevedra, Miguel Anxo Fernández Lores, para abordar esta actuación.
Ambos se comprometeron a "compasar" o ritmo das obras coa tramitación administrativa para permitir que o establecemento poida estar aberto nunha época de "especial afluencia" de visitantes, a gran final das Series Mundiais de tríatlon en setembro.
O cronograma destes traballos, segundo Gulías, está "preparado" para que o Parador de Pontevedra poida aloxar aos deportistas desta cita deportiva, aínda que "con todas as reservas" ao tratarse de obras nas que "non se pode garantir" cando terminarán.
Con respecto á actuación prevista, Paradores do Estado pretende impulsar unha renovación integral de todo o inmoble para "modernizalo e melloralo", destacou a edil do BNG.
Así, ademais de renovar a cuberta para acabar coas filtracións de auga e illar o edificio de maneira máis eficiente, cambiaranse as baixantes e canlóns, impermeabilizarase toda a estrutura e solucionaranse diversos problemas de accesibilidade.
Tamén se renovará toda a rede de saneamento e as tubaxes de auga fría, reforzarase a sala de caldeiras, cambiaranse os equipos de climatización ou se impulsará a mellora no acabado dos chans e os pavimentos de todo o complexo.
"É unha renovación integral do Parador para que siga sendo a hospedaxe máis emblemática de Pontevedra", sentenciou Anabel Gulías, que engadiu que estas obras de reforma estenderanse ao amplo xardín co que conta o establecemento.