Ata 27 novos positivos por covid-19 detectáronse tras o cribado preventivo realizado a preto de 200 pacientes ingresados no Hospital Provincial e aos 960 profesionais sanitarios que, nestes momentos, traballan nel, a raíz do gromo no servizo de Oncoloxía.
Tras o procesado de mostras revelouse que dezasete deses casos corresponden a profesionais de diversas categorías, maioritariamente asintomáticos, que segundo a área sanitaria contaxiáronse no eido social e familiar e non polo gromo detectado no hospital.
Os outros dez infectados son pacientes que se atopan hospitalizados neste centro.
A esta cifra de contaxios que arroxa o cribado preventivo hai que sumar os 27 casos vinculados directamente co gromo de Oncoloxía: dez pacientes, nove profesionais sanitarios e oito familiares dos ingresados.
Ante esta situación, a área sanitaria reforzará os controis de acceso e os aforos nos seus hospitais para evitar situacións de risco e novos contaxios.
A este respecto, Sanidade insta tanto a usuarios como a profesionais a respectar e cumprir estes condicionamentos de seguridade.
De xeito complementario e no que atinxe ao réxime de visitas a pacientes hospitalizados por parte de familiares e achegados, a área sanitaria recorda que está limitado a un visitante por cada paciente que requira certo apoio. No caso de pacientes con patoloxías de menor gravidade as visitas están prohibidas.