Un total de dez eventos de carácter lúdico contarán cunha subvención obtida a través da liña de axudas promovida desde a Concellería de Festexos do Concello de Poio para a realización deste tipo de actividades, entre as que se inclúen festas patronais, parroquiais, gastronómicas ou festivais.
O reparto destas achegas, aprobado pola Xunta de Goberno Local, seguiuse a través dun réxime de concorrencia competitiva.
En total foron 62.500 euros os destinados polo Concello a esta iniciativa.
O listado de eventos pódese consultar na Sede Electrónica e son os seguintes: a XL Semana Cultural Aires de Cultura, organizada polo Ateneo Corredoira, a IX Oktoberfest (ACD Campelo), Festa da Fátima (Comisión de Festas de Campelo), Festas do Carme e de San Roque (Comisión de Festas do Carme de Combarro), Festas de San Antón, do Carme e das Dores (ACD Andaina de Samieira), Festas de San Gregorio e da Saleta (Asociación Cultural Festas de Raxó) e Festas de San Salvador (Asociación Cultural Viñas de San Salvador). O reparto das contías oscilan entre os 2.300 e os 9.500 euros, aproximadamente.
Os detalles pódense consultar no Portal de Transparencia, no apartado Axudas e Subvencións.
Para poder optar a esta liña de axudas, os colectivos e entidades solicitantes deben carecer de fins de lucro e estar inscritos no Rexistro Municipal de Asociacións, mantendo os seus datos debidamente actualizados. O período de realización destas citas lúdicas subvencionadas vai desde o pasado 11 de novembro de 2022 ata o 10 de novembro de 2023.
Á hora de valorar as propostas, dentro da concorrencia competitiva, tivéronse en conta criterios como a programación do evento (número de actuacións musicais profesionais ou de grupos folclóricos, accesibilidade, respecto polo medio ambiente), o fomento do equilibrio de xénero, da igualdade e do patrimonio inmaterial, así como o orzamento total subvencionable.
A través desta liña de axudas pódese cubrir como máximo o 50% dos custes da organización de cada evento.