O Concello de Pontevedra vén de aprobar a sinatura dunha nova addenda ao convenio para o desenvolvemento da futura estación intermodal que a Xunta de Galicia executa a través dos Fondos Feder. Nesta addenda o Concello reduce a súa achega en máis de medio millón de euros, quedando o financiamento municipal en 1.029.388 euros.
A reforma da estación intermodal está en marcha dende fai case un ano e debido ás incidencias vividas ao longo do ano 2020, o proxecto acumula certo atraso, tal e como se lle informou ao concelleiro de Mobilidade, Demetrio Gómez, por parte da Xunta de Galicia.
A pesar desta situación, o Concello quere cumprir cos prazos fixados no convenio mantendo as achegas económicas fixadas, pero adaptadas á realidade actual logo das baixas da adxudicación da obra e da execución.
O Concello tiña que facer unha achega de 1.537.917 euros, é dicir, o 42,98% do total do orzamento da actuación (3,3 millóns de euros) e que se corresponden co 25% do total do financiamiento do custo total das actuacións previstas.
O orzamento para a adecuación para a intermodalidad do conxunto formado polas actuais terminais de autobuses e ferroviaria de Pontevedra, tiña un orzamento de licitación de 3.375.952 euros, que asumiron 75% a Xunta e 25% o Concello. Mentres que o financiamento da reforma da estación de autobuses asúmea integramente a Xunta.
Finalmente, logo das readaptacións económicas, o Concello terá que facer unha achega global de 1.029.388 euros, é dicir, 508.529 euros menos do previamente fixado.
Sobre como se librarán estes gastos, o Concello xa fixo unha achega de 615.167 euros e está pendente de facer unha achega de 400.000 euros quince días despois da sinatura desta addenda.
Para o ano 2021 quedaría pendente o abono de 14.221 euros.