O goberno municipal de Pontevedra reactiva a súa aposta por un sistema de transporte a demanda, o denominado 'coche de punto'. Faino tras confirmar as tarifas que terán que pagar os seus usuarios por cada viaxe entre as parroquias do rural e o centro da cidade.
Así, na proposta que xa está a exposición pública, figura que cada servizo custará 2,15 euros. É o prezo que, de maneira global, terá que pagar cada unha das persoas que se suba ao vehículo, que poderá ser compartido por varios pasaxeiros.
Haberá ademais bonificacións para diferentes segmentos de poboación, sobre todo para os menores de 10 anos que viaxarán gratis. Ademais, as persoas xubiladas e desempregadas terán descontos do 40% e do 25%, respectivamente.
As arcas municipais asumirán un custo fixo de 3,75 euros por cada viaxe, o mesmo que custa a actual baixada de bandeira dos taxis durante o día.
A este diñeiro sumarase unha cantidade variable, que se fixou nos 1,08 euros por quilómetro percorrido entre as quince parroquias do rural e o centro da cidade.
Como estaba previsto, o 'coche de punto' será un servizo que só poderán prestar os 88 taxistas con licenza en Pontevedra. Haberá unha APP e un número de teléfono para que os usuarios poidan solicitar as súas viaxes.
"É un servizo que hai que prestar porque hai xente que o necesita. Pero non vai ser masivo", asegurou o edil César Mosquera. A este respecto, o goberno municipal entende que o 'coche de punto' será máis "unha cuestión social que un transporte".