Ata Cardiff, a capital de Gales, viaxou Posto, o can que máis tempo levaba sendo coidado no Centro de Acollida e Protección de Animais (CAAN) da Deputación de Pontevedra.
Este staffordshire terrier fora recollido en Redondela en xullo do ano 2018 cando era un cachorro e a súa adopción foi posible grazas á mediación dunha rede de persoas voluntarias.
Grazas a ela, contactouse cunha das fundadoras da asociación británica Five Circles Dog Rescue, que é galega e reside no Reino Unido, que axudou a buscar un fogar para el.
A saída de Posto do CAAN tiña a priori máis dificultades xa que en España a súa raza está catalogada como potencialmente perigosa. Non ocorre o mesmo nas illas británicas, e o can está coa súa nova familia en Gales, a onde chegou a pasada Semana Santa.
"É un animal moi vital e estamos felices de que por fin teña conseguido un bo fogar. Leva só uns días en Cardiff, pero está a adaptarse moi ben", sinalan desde a capital galesa.
A saída de Posto leva consigo outra boa nova, que é xa non hai no CAAN animais que leven no centro máis de dous anos, no marco do obxectivo da Deputación de que os cans pasen o menor tempo posible nas instalacións e acaden a súa adopción.
Neste momento, os cans máis veteranos son Solo e Pasalo, ambos cunha idade de oito anos e que están acollidos desde o 2020, cando foron recollidos en Marín e Sanxenxo respectivamente.
No que se refire ao animal de maior idade, é a cadela Puri, que conta con once anos e fora recollida no concello do Porriño.
A adopción destes cans é agora a prioridade que se marca a institución provincial.
Desde o 1 de xaneiro tramitáronse xa un total de 184 adopcións, todas elas en territorio nacional e a maioría en Galicia (153), seguida por Castela e León (28). Madrid, a Comunidade Valenciana e Asturias adoptaron un cada unha delas.
Das formalizadas na comunidade, 134 adopcións foron na provincia de Pontevedra, oito na Coruña, oito en Lugo e tres en Ourense.