Garantir os circuítos peonís nunha área na que hai espazos que teñen unha gran afluencia de persoas. É o obxectivo dos traballos que comezaron este xoves na contorna da Alameda para reforzar a prioridade peonil deste ámbito urbano.
O Concello consideraba prioritaria esta actuación ao coincidir alí a propia Alameda, o centro de saúde Virxe Peregrina, a parada de taxis, a facultade de Belas Artes ou a praza de España.
O concelleiro de Obras, Demetrio Gómez, explicou que será unha obra de "precisión cirúrxica" coa que se mellorará a seguridade viaria, a accesibilidade e se garantirá a preferencia peonil nas plataformas únicas que existen nesta contorna.
Está previsto que no tramo da rúa Alameda, entre a rotonda de San Roque e o centro médico Virxe Peregrina, se reorganice toda a zona de estacionamento.
Alongarase a parada de taxis, que quedará no mesmo lugar que ocupa actualmente, seguido dunha zona de estacionamento destinada a uso da universidade, e en terceiro lugar situaríanse as prazas de aparcadoiro para motos.
Neste tramo de rúa tamén se reforzará a seguridade viaria coa instalación dun redutor de velocidade á altura da parada de taxis.
Nos arredores do edificio da Subdelegación do Goberno, pola súa banda, a actuación irá encamiñada a mellorar a accesibilidade e a protexer os circuítos peonís ante certos problemas de convivencia con vehículos que se detectaron nalgúns puntos.
Nesta área procederase á reposición de pavimento e á instalación de bolardos tanto nun lateral do edificio, na rúa Doutor Enrique Marescot, como na parte traseira, na rúa Prudencio Landín.
A instalación de bolardos nestas dúas rúas, segundo o Concello, evitará situacións detectadas con vehículos que estacionaban invadindo o espazo público destinado a peóns, de cara a reforzar a prioridade peonil coa que foron concibidas estas plataformas únicas.