O alcalde de Vilanova de Arousa, Gonzalo Durán, anunciou a súa intención de presentar unha nova denuncia penal contra a presidenta da Deputación de Pontevedra, Carmela Silva á que chamou "presunta delincuenta" pola paralización das obras de mellora da estrada provincial EP-9701 que comunica Baión con András.
Este proxecto estaba comprometido polo anterior presidente provincial Rafael Louzán, do mesmo xeito que os da estrada que une Mosteiro e Arcos ou diversas melloras en viais de Moraña ou Cercedo-Cotobade.
Para o popular Gonzalo Durán detrás da paralización destes traballos atópase unha "trama corrupta" do goberno provincial que desviaría eses fondos para o Concello de Vigo. "La presunción de que son unos delincuentes está clara", asegurou.
O rexedor vilanovés denunciará á presidenta e "a quienes hayan sido cómplices de ese comportamiento", dixo en referencia aos funcionarios que supervisan os proxectos.
"Hay que saber si estamos gobernados por delincuentes. Chavistas ya lo sabemos, delincuentes lo sabremos ahora", dixo este luns en rolda de prensa.
"Va a tener que entrar la Guardia Civil en la Deputación a buscar los papeles", advertiu o alcalde de Vilanova de Arousa.
Despois de chamar á presidenta da Deputación de "chacha para todo", agora Durán Hermida afirma que Carmela Silva é unha "presunta delincuenta" e insinúa a existencia dun delito de prevaricación.
O grupo provincial do Partido Popular apoiou a Gonzalo Durán nesta denuncia ofrecéndolle "toda a colaboración" e o portavoz popular na Deputación, Jorge Cubela tamén acusou ao goberno provincial de "sectarismo político" e de "falta de honradez".
O PP pedirá unha comisión extraordinaria en Deputación para tratar este asunto.