Un ano máis, Pontevedra volverá ver o demo polas súas rúas correndo tras os máis pequenos que, á súa vez, tentarán arrincarlle o rabo. A Festa do Demo chegará o 23 de agosto, véspera de San Bartolomeu, retomando unha tradición previa á Guerra Civil.
A concelleira de Festas, Carme da Silva, acompañada por representantes do grupo de música tradicional Os Chichisos e da Orquestra Fiadeiro, presentaba durante o mediodía deste venres 19 esta celebración que se iniciará ás 12.30 nos arcos de San Bartolomeu co percorrido polo centro histórico.
O Concello fai un chamamento para que os nenos se disfracen para a ocasión con traxes infernais. Ás 21.00 horas desenvolverase o concerto da Banda de Música de Salcedo na praza de José Martín.
Ás 20.00 horas o demo volverá saír por segunda vez dos infernos para que ás 21.30 na praza de Curros Enríquez celébrese a súa Foliada. Nesta ocasión a música chegará a través de Os Chichisos e da Orquestra Fiadeiro, unha agrupación que combina a tradición da gaita con metais para interpretar temas de bandas de musica ou ritmos suramericanos.
A Foliada contará con personaxes da época, como axentes da Benemérita, curas ou rosquilleiras.