Pontevedra volveu a investir a tendencia e recupera a senda do descenso no desemprego. Novembro pechou con 5.049 persoas sen emprego na cidade. Son 69 menos das que figuraban nas listas dos servizos públicos de emprego no mes de outubro.
Este descenso do 1,36% sitúa o número de desempregados en Pontevedra nun nivel practicamente idéntico ao que había en xuño. Con respecto ao último ano, o descenso no paro roza o 18%. En novembro de 2020, había 6.155 pontevedreses sen traballo.
Entre os desempregados en Pontevedra hai 3.018 mulleres, un 67,29% do total, e 2.031 homes, segundo os datos da Consellería de Emprego e Igualdade.
A maior bolsa de parados está no sector servizos con 3.751 (-53), seguido de industria con 443 (-14), construción con 343 (-12) e agricultura con 127 (+4). No colectivo sen emprego anterior son 385 (+6).
Entre os municipios da área de Pontevedra, aínda que na maioría deles descendeu o paro, déronse datos dispares durante este mes de novembro.
Así, fronte a baixadas máis ou menos acusadas como as de Vilagarcía, Cerdedo-Cotobade, Ribadumia, Bueu ou Moraña, o paro creceu en Sanxenxo, Ponte Caldelas, Vilanova de Arousa, Poio, Portas ou A Lama.
DATOS PROVINCIAIS
Segundo os datos do Ministerio de Traballo feitos públicos este xoves na provincia de Pontevedra o paro baixou en 492 persoas o pasado mes de novembro.
Na provincia hai un total de 59.502 persoas rexistradas como demandantes de emprego nas oficinas do Servizo Público de Emprego Estatal (SEPE). Isto supón 12.057 persoas desempregadas menos que hai un ano.
GALICIA E ESPAÑA
En Galicia en número de parados é de 152.747 persoas. Este pasado mes de novembro baixou o número de parados en 1.298 persoas. Son 39.709 parados menos que en novembro do pasado ano (-18,52%).
España rexistra un dobre récord de caída do paro: baixa en 74.381 persoas, a maior baixada da serie nun mes de novembro e amplíase a nove meses o período acumulado de descensos. Nestes nove meses, o total de persoas rexistradas descendeu en 826.102.
A cifra total de paro rexistrado sitúase, por tanto, nas 3.182.687 persoas, a cifra máis baixa nun mes de novembro desde 2008. Tamén reduce os niveis previos á pandemia: en novembro hai 63.360 persoas rexistradas como paradas menos que en febreiro de 2020.
O paro rexistrado descende en todos os sectores económicos e en todos os tramos de idade. O descenso é máis acentuado entre as mulleres que entre os homes e hai menos mulleres e menores de 25 anos en paro que antes da pandemia.
En novembro asináronse un total de 282.981 contratos indefinidos, a cifra máis alta de toda a serie histórica.