O Centro de Coordinación Operativa (Cecop) creado pola Xunta de Galicia para fracer fronte ao coronavirus mantivo este domingo unha nova reunión na que que aprobou novas medidas de prevención e concretou as xa aprobadas nos últimos días. Todas entrarán en vigor este luns 16 de marzo.
A xuntanza, presidida polo presidente da Xunta, Alberto Núñez Feijóo, serviu, polo tanto, para concretar que se suspende a actividade económica dos concesionarios de venda de automóbiles e que os establecementos que combinen reparación con venda de vehículos soamente poderán realizar a actividade de reparación.
Así mesmo, suspéndense as actividades económicas correspondentes a academias, autoescolas e salóns de peiteado, con excepción da prestación a domicilio desta últimas para garantir o servizo. Tamén regula que poderá seguir realizándose o labor dos gabinetes de psicoloxía e pedagoxía.
Ante as consultas formuladas á Xunta desde distintos sectores, o texto que se publicou este luns no Diario Oficial de Galicia aclara tamén que poden permanecer abertas actividades sanitarias e de servizos sociais -entre elas, actividades hospitalarias, médicas e odontolóxicas, asistencia en establecementos residenciais-; actividades financeiras e de seguros; actividades profesionais, científicas e técnicas; actividades administrativas e servizos auxiliares; e asistencia en establecementos residenciais con coidados sanitarios.
Tamén poderán abrir de forma autorizada os establecementos dedicados a actividades de servizos sociais sen aloxamento; reparación de ordenadores, efectos persoais e artigos de uso doméstico; lavado e limpeza de prendas téxtiles e de pel; pompas fúnebres e actividades relacionadas; fisioterapeutas; e técnicos de reparación e mantemento.
A reunión tamén serviu para determinar que a Xunta blinda os servizos básicos ás persoas sen fogar e velará pola apertura de todos os albergues sociais para que as persoas sen fogar poidan dispor dun servizo de pernoita, extremando as precaucións na liña das recomendacións das autoridades sanitarias. As cociñas económicas e comedores sociais deberán manter o seu funcionamento habitual, tomando as medidas necesarias para que se limite a presenza simultánea de comensais a un terzo do aforo, e reforzando o subministro de comida para o consumo fóra do centro.
Os centros de atención social continuada manterán a súa actividade tomando as medidas necesarias para que se limite a presenza simultánea de persoas usuarias a un terzo do aforo. Os centros de día de inclusión social suspenderán a súa actividade regular durante o período de emerxencia sanitaria, agás os servizos de mantemento da hixiene -como ducha ou lavandería- e os servizos de calor e café.
Por outra banda, as visitas aos centros residenciais de servizos sociais (como, por exemplo, residencias de persoas maiores ou con discapacidade) quedan restrinxidas agás en casos excepcionais debidamente autorizados pola dirección do centro.
En relación coa suspensión da actividade comercial minorista, inclúense dentro das excepcións as ópticas; a actividade das lonxas; e comercio ao retallo de ferraxería, pintura e vidro en establecementos especializados, en tanto que se trata de actividades que deben subministrar ao sector primario, gandeiro, pesqueiro e agrícola elementos necesarios para a súa actividade. Tamén estarán permitidos os servizos que ofrecen os veterinarios, tanto das empresas privadas como dos servizos oficiais.
Así mesmo, o documento precisa que todos os establecementos comerciais de primeira necesidade terán liberdade horaria, para fixar sen limitacións o peche e a apertura dos seus establecementos comerciais.
En relación co Camiño de Santiago, e como consecuencia do peche de albergues da rede pública: actívase un servizo de acollida provisional no albergue público do Monte do Gozo, en Santiago, para aos peregrinos que se atopen en tránsito e mentres non dispoñan doutros medios de regreso ou aloxamento.
Por último, non estarán permitidas as actividades de uso público no Parque Nacional Marítimo Terrestre das Illas Atlánticas e suspéndese a realización de queimas nos terreos rústicos