Rafa Domínguez, voceiro municipal do Partido Popular e xefe da oposición en Pontevedra, lanzou duras críticas contra a xestión do goberno local liderado polo alcalde Miguel Anxo Fernández Lores en materia de limpeza urbana e recollida de lixo.
Segundo Domínguez, Pontevedra atravesa unha crise de limpeza sen precedentes: "a cidade está sucia, e esta situación estendeuse mesmo ao centro urbano".
Neste sentido ofreceu imaxes con acumulación de lixo en varios puntos do municipio tanto no centro urbano: Arcebispo Malvar, Rúa das Ánimas, Rúa San Antoniño, Rúa da Santiña; como nas parroquias de Bora, Mourente, Ponte Sampaio, Xeve e Campañó.
"No día a día, vemos que a cidade está sucia, pero en momentos de tensión, de maior afluencia turística ou durante as festas, a situación empeora considerablemente", advertiu o voceiro popular lamentando que varios comerciantes tivesen que limpar as rúas despois da Batalla de Flores das Festas da Peregrina.
"Os propios traballadores denuncian a falta de persoal e de maquinaria", lembrou a raíz do comunicado elaborado polo comité de empresa de PreZero, empresa concesionaria do servizo de limpeza na cidade.
"Incrementouse a presenza de malos cheiros na cidade", afirmaba esta mañá o representante do PP sinalando que "Pontevedra está sucia porque os traballadores da limpeza non teñen os medios nin os recursos necesarios para prestar un servizo de calidade".
Neste sentido, Domínguez incidiu na preocupante situación que se arrastra con continuas prórrogas durante os últimos anos do contrato de lixo ante a falta de adxudicación do novo contrato.
"Desde que Lores chegou ao poder, non foi capaz de sacar un novo contrato de lixo. O actual data de 1999, cando foi contratado polo PP", expuxo cualificando o actual contrato como "obsoleto" e lamentando os intentos fallidos durante os últimos meses para sacar o novo contrato do servizo. "En 2023 prometeron ter o mellor contrato, pero ningunha empresa se ofreceu", apuntou.
"Anunciarannos un novo contrato de 13 millóns de euros, que custará o dobre a todos os pontevedreses. Pasaremos de 7 a 14 millóns, un derroche inasumible", denunciaba Rafa Domínguez.
Tamén criticou a situación no rural incidindo no "desperdicio irresponsable" do diñeiro que sae das arcas municipais desde 2015 para pagar por un terreo na Canicouva onde "nin está, nin seguramente se vaia construír" a planta de compostaxe que proxectaba o goberno local.
Domínguez comparou a situación de Pontevedra con outras cidades: "Segundo a OCU, Oviedo é a cidade máis limpa de España, mentres que Pontevedra está á cola xunto con A Coruña e Ourense en Galicia".
Finalmente, o líder da oposición reclamou ao goberno do BNG accións inmediatas: "Esiximos a Lores que faga xa algo porque Pontevedra non pode estar así".
LORES RESPONDE: "Niso estamos"
Lores respondeu ás duras críticas do líder do PP recoñecendo, como xa fixo en anteriores ocasións, que "hai un déficit importante no servizo que non ten xustificación ningunha", pero indicando tamén que o Goberno local está traballando no novo contrato ."Niso estamos", sinalou.
Sobre os problemas do servizo, dos que son "conscientes hai moito tempo", indicou que xa lle "chamaron a atención" á empresa e agora irá ás máis altas instancias da compañía e lembrarlle que teñen o contrato prorrogado ata xuño de 2025 e "teñen que cumprir".
O alcalde recoñece que o contrato actual "é insuficiente" porque a cidade medrou nos últimos 20 anos e a lexislación cambiou, por iso comezaron a tramitación dun novo, coas dificultades xa coñecidas de que o primeiro concurso quedou deserto e tiveron que reformulalo.