O goberno municipal de Pontevedra tomou a súa primeira decisión de calado para a elaboración dos seus orzamentos para 2021. Do mesmo xeito que os seis anos anteriores, o Concello decidiu conxelar todos os impostos e taxas que dependen da administración local.
Así o avanzou este mércores o edil de Facenda, Raimundo González. Os cinco impostos e a vintena de taxas que cobra o Concello, por tanto, permanecerán "inalterados". Non se repercutirá tampouco no seu custo o IPC correspondente.
"Non se vai a tocar absolutamente ningunha", engadiu o concelleiro nacionalista, que defendeu que con esta decisión Pontevedra manterase, segundo datos do Ministerio de Facenda, entre as capitais españolas cunha menor presión fiscal.
O incremento que o goberno prevé nos seus ingresos por estes conceptos, segundo o responsable das contas municipais, chegará pola vía da actualización dos censos ou polas inspeccións para detectar casos de fraude.
A este respecto, avanzou que o Concello inspeccionará en 2021 a taxa de ocupación que se lle cobra ás grandes compañías de gas, electricidade ou telefonía polo uso da vía pública, que reporta anualmente uns 300.000 euros ás arcas municipais.
Para a elaboración do novo orzamento, explicou Raimundo González, o Concello estase atopado con dous "problemas maiúsculos".
Por unha banda, o Estado aínda non informou do diñeiro que remitirá aos concellos en 2021 e que, no caso de Pontevedra, sitúase na actualidade nuns 20 millóns de euros. Sen esa previsión, recoñece o edil, é "difícil" avanzar no deseño das contas.
"Agardamos sabelo todo antes de que remate este mes", subliñou González, do mesmo xeito que se, como nos últimos tres anos, o executivo central acordará aumentar o salario dos funcionarios públicos, o que tamén impactaría nas contas para 2021.
Sexa como sexa, o Concello descarta prorrogar os orzamentos de 2020. "Son firmemente partidario de facer un orzamento novo", insistiu o responsable de Facenda, xa que pola contra non podería haber investimentos novas que axuden a dinamizar a economía local.
Raimundo González entende que "con máis razón" nas circunstancias actuais é "fundamental" aprobar un novo orzamento. De non ser así, concluíu, "non é que vaiamos ao abismo, pero iremos jodidillos".