As autoridades sanitarias extremaron a atención no albergue de Cáritas en Salcedo, habilitado durante este estado de alarma para acoller a persoas sen teito, tras detectarse o martes pola noite un positivo por coronavirus entre os residentes temporais.
O paciente infectado, un home de 60 anos, foi ingresado no Hospital Montecelo e o resto dos usuarios, ata 25 nos últimos días, non presentan síntoma algún da enfermidade, segundo explicou o alcalde de Pontevedra, Miguel Anxo Fernández Lores.
Todas as persoas que están no albergue foron examinadas e establecéronse "medidas de separación" para evitar que o virus poida estenderse.
A situación do albergue, que fora habilitado polo Concello en colaboración con Cáritas, quedou baixo supervisión dos departamentos de Sanidade e Política Social da Xunta de Galicia, apuntou o rexedor pontevedrés.
Por agora, o protocolo activado non recomendou ningunha medida adicional ou a evacuación das persoas sen teito que pernoitan nel.
O Concello, en todo caso, asegurou que preparou un "plan B" por se reciben a orde de trasladar aos residentes e recolocalos noutras instalacións "se é necesario", apunta Fernández Lores. "De momento non nos dixeron nada", engadiu.
Tras coñecerse o positivo, un equipo da Brilat acudiu ás instalacións para realizar unha desinfección urxente do albergue, tarefa para a que contaron co apoio de axentes da Policía Local de Pontevedra e voluntarios da agrupación de Protección Civil.