No Partido Popular non sentaron demasiado ben as declaracións realizadas este xoves polo comité de empresa de Elnosa, nas que aseguraban que a solución ao futuro da cloreira a teñen os populares. Jacobo Moreira rexeita ese extremo e recórdalle aos traballadores que é o Concello de Pontevedra o que "debe decidir" o futuro da fábrica de Lourizán.
Nun comunicado, o voceiro do PP en Pontevedra reitera que o que aconteza con Elnosa "depende dos nacionalistas, non do Partido Popular", xa que asegura que a licenza necesaria para a súa continuidade, unha vez cambien a súa tecnoloxía, deberá ser outorgada ou denegada polo goberno municipal.
O comité de empresa está "moi equivado", sinala Moreira, que insta os traballadores a "xestionar" o futuro de Elnosa co concello pontevedrés.
"Como ben saben os traballadores de Elnosa, o partido que gañou as eleccións o pasado 24 de maio foi o BNG. Son eles os que gobernan Pontevedra, polo que é aos nacionalistas aos que lles corresponde decidir o futuro da cloreira. A solución para estes traballadores está nas mans do BNG, e non nas do Partido Popular como queren facer crer", concluíu o voceiro do PP.