O goberno municipal de Pontevedra celebra o impulso que a Xunta de Galicia dará á construción de vivenda protexida, especialmente polas dúas mil vivendas que prevé construír en dúas parcelas situadas na zona de San Mauro.
"Agardamos que se concrete nos próximos meses porque sería moi boa noticia para a cidade e para toda a xente que está agardando por estas vivendas", sostivo o edil responsable da área municipal de urbanismo, Alberto Oubiña.
Estas dúas parcelas, segundo explicou Oubiña, son de titularidade privada e forman parte dos terreos suxeridos polo Concello á Xunta para desenvolver novos polígonos de vivendas.
Son, en concreto, a parcela identificada como B5 no plan urbanístico en vigor, un terreo de 177.000 metros cadrados delimitado polas rúas Camposanto, Pintor Laxeiro e Pedra do Lagarto; e a parcela B2, de 38.400 metros cadrados, en Conde Bugallal.
O executivo autonómico optou por estas parcelas pola súa proximidade á cidade e, sobre todo, polo seu tamaño, ao permitir un maior desenvolvemento e densidade de vivendas.
O concelleiro de urbanismo asegurou que o Concello ofrecerá unha colaboración "fluída" para que a Xunta poida impulsar esta iniciativa tendo en conta que "cada quen ten os seus tempos" e ábrese mesmo a que esta operación poida desenvolverse por fases.
Á administración municipal, ademais da incorporación destas dúas mil vivendas ao parque inmobiliario de Pontevedra, interésalle tamén a urbanización destes terreos porque permitirán mellorar a mobilidade na zona leste da Boa Vila.
Os viarios que se habilitarán para acceder a estes novos polígonos de vivendas servirán, segundo Alberto Oubiña, para que haxa unha mellor conexión entre o barrio da Parda e a Rolda Leste, reducindo a presión do tráfico sobre todo este ámbito urbano.
Por iso é polo que Oubiña reitere que ao Concello resúltalle "moi interesante" que se estean estudando estas zonas para construír novas vivendas, lembrando ademais que nas inmediacións deste ámbito estará tamén o futuro edificio municipal de emerxencias.