Na Casa de Cultura de Dorrón está a impartirse formación en seguridade viaria e primeiros auxilios destinada ao setenta migrantes de Mali aloxados en Sanxenxo desde o pasado mes de setembro.
O policía local Abelardo Martínez e traballador de Emerxencias Santi Salomón encargáronse de impartir a clase coa que se lles dá ferramentas de como actuar en caso de emerxencia, normas de seguridade viaria tanto para peóns como para condutores, medidas de retención en vehículo.
Tamén se lles informa de cando realizar unha chamada de emerxencia ao número 112, como facer unha valoración dunha vítima, saber como é a posición lateral de seguridade, realizar unha reanimación cardiopulmonar ou a manobra de Heimlich para persoas que sofren un atragantamiento.
Este tipo de formación inclúese dentro das actividades coas que o Concello de Sanxenxo colabora con Accem, a ONG que se encarga do seu coidado.
"Queremos que saibades que estamos aquí para axudarvos e esta clase é unha forma de que vos movades de forma segura por Sanxenxo ou calquera sitio", explicou a concelleira Paz Lago. Na mesma liña, manifestouse Xoán Pérez que lles animou "a pedir axuda sempre que o necesitedes".
A pesar das barreiras do idioma, tanto Abelardo Martínez como Santi Salomón conseguiron facer chegar a súa formación a través de vídeos e de casos prácticos axudándose dos migrantes que teñen un mellor nivel de español para lograr facerse entender por todos os asistentes con explicacións no seu idioma natal e tamén en castelán.
Trátase dunha formación transversal que inclúe non só a educación viaria e os primeiros auxilios, senón tamén unha forma de socialización e de aprendizaxe do idioma.