Marea Pontevedra critica o acordo acadado no Pleno da Corporación municipal de Pontevedra para pedir a axilidade das obras da autovía A-57, unha petición á que xa respondeu o Consello de Ministros dando luz verde á contratación do primeiro tramo do proxecto e que para este movemento cidadán "pon máis unha vez de manifesto que os tres grupos representados na actualidade na Corporación van da man na maior parte dos temas".
O acordo plenario adoptouse a proposta do Partido Popular e contou co apoio do BNG e do PSOE. Ante a súa adopción, Marea Pontevedra critica a simbiose entre os tres partidos "sen importarlles os incumprimentos legais".
Marea lembra as máis de 15.000 sinaturas contra a A-57 recollidas xa pola plataforma 'Salvemos a Fracha' contra o proxecto da A-57 e amosa a súa "estrañeza" coa "insólita celeridade" coa que só catro días despois dese acordo o Consello de Ministros fixo efectiva esa demanda.
Dentro da súa rolda de contactos con distintos colectivos veciñais e sociais, Marea Pontevedra visitou nos últimos días os lugares sobre os que discorre o trazado proxectado polo Ministerio de Fomento para a autovía A-57 ao seu paso polo termo municipal de Pontevedra, desde o límite co concello de Vilaboa ata o lugar da Ermida, na parroquia de Marcón. Varios integrantes do movimento cidadá acudiron acompañados da coordinadora de 'Salvemos Fracha'.
Lembra a "insólita celeridade" coa que só catro días despois o Consello de Ministros fixo efectiva a demanda
Na súa opinión, este tramo de 6,48 quilómetros de lonxitude é demasiado exterior para que, en efecto, poida ser considerado unha circunvalación -tal e como o vende Fomento-, e causará danos (social, patrimonial e ecoloxicamente) moito maiores ca os seus pretendidos beneficios.
O percorrido sobre o terreo serviu para comprobar como o corredor proxectado esgazará o territorio, segundo este colectivo, con taludes no Monte Loureda e no lugar de Pintos de ata sesenta metros de altura (un edificio de 17 andares). Tamén se viu que os desmontes castigarán o rico patrimonio histórico da zona, coma o Castro da Farexa, ou a Mámoa e petróglifo de A Román, e terán efectos "devastadores" sobre a hidroloxía, alterando ríos (Pintos ou Gafos), ducias de mananciais e centos de pozos de regadío da zona rural colindante.
Ademais, denuncian que a A-57 afectará negativamente á paisaxe, os usos de esparcemento e lecer da veciñanza e, asemade, os montes comunais das parroquias de Vilaboa, Figueirido, Bértola, Tomeza Marcón.