Non comezou ben o ano na cidade de Pontevedra, no que respecta aos índices de desemprego. O mes de xaneiro deixou 310 parados máis na Boa Vila, un 5,14% máis que en decembro, segundo os datos que divulgou este venres a Consellería de Economía, Emprego e Industria. Así, Pontevedra suma 6.337 persoas anotadas nas listas do servizo público de emprego.
O aumento foi a tónica xeral en todos os concellos das comarcas do ámbito de influencia da capital. A excepción foron os municipios que contan co turismo termal como gran baza para o inverno, como Caldas de Reis ou O Grove que, xunto con Marín e Ribadumia en menor medida, foron os únicos que melloraron os datos de desemprego.
| Xaneiro | Decembro | Variación | |
| Pontevedra | 6.337 | 6.027 | 310 |
| Barro | 309 | 301 | 8 |
| Bueu | 867 | 821 | 46 |
| Caldas de Reis | 811 | 845 | -34 |
| Cambados | 1.200 | 1.159 | 41 |
| Campo Lameiro | 149 | 147 | 2 |
| Cerdedo-Cotobade | 406 | 396 | 10 |
| Cuntis | 361 | 354 | 7 |
| O Grove | 1.058 | 1.065 | -7 |
| A Illa de Arousa | 341 | 311 | 30 |
| A Lama | 187 | 177 | 10 |
| Marín | 1.779 | 1.783 | -4 |
| Meaño | 433 | 437 | -4 |
| Meis | 400 | 397 | 3 |
| Moraña | 369 | 355 | 14 |
| Poio | 1.209 | 1.152 | 57 |
| Ponte Caldelas | 541 | 538 | 3 |
| Portas | 231 | 223 | 8 |
| Ribadumia | 359 | 360 | -1 |
| Sanxenxo | 1.342 | 1.296 | 46 |
| Vilaboa | 460 | 424 | 36 |
| Vilagarcía de Arousa | 3.687 | 3.630 | 57 |
| Vilanova de Arousa | 841 | 819 | 22 |
DATOS PROVINCIAIS
Na provincia de Pontevedra o número de parados rexistrados nas oficinas dos servizos públicos de emprego (antigo Inem) subiu en xaneiro en 1.814 desempregados respecto ao mes anterior (+2,46%), arrastrado principalmente polo sector servizos, que acusou o fin da campaña do Nadal, segundo informou este venres o Ministerio de Emprego e Seguridade Social.
En comparación co dato de xaneiro do pasado ano 2017 o paro na provincia descendeu en 9.123 persoas, en porcentaxe é un -10,79%.
En Galicia o paro subiu en 4.873 persoas, un 2,63 por cento, respecto ao mes anterior, o que deixa o número total de desempregados na nosa comunidade en 189.886 persoas.
Respecto ao ano anterior, con todo, o paro descendeu en 22.192 persoas, un 10,46 por cento, segundo os datos divulgados hoxe polo Ministerio de Emprego e Seguridade Social.
En canto a actividades, o groso de parados está situado no sector servizos, con 127.528 persoas, seguido pola industria, 21.360 persoas e a construción, con 18.286 persoas. En agricultura había en xaneiro 7.102 parados e o colectivo sen emprego anterior supuxo 15.340 parados.
ESPAÑA
En toda España, o paro situouse en xaneiro en 3.476.528 persoas, con 63.747 desempregados máis, un 1,87 por cento.
O dato da taxa interanual é positivo, con 283.703 desempregados menos, un 7,54 por cento.
O Ministerio de Emprego destacou o número de contratos rexistrados durante o mes de xaneiro que foi de 1.749.911, cifra un 7,1% superior á do mesmo mes de 2017 e a máis alta nun mes de xaneiro de toda a serie histórica. En xaneiro de 2018 rexistráronse 172.953 contratos de carácter indefinido, o 9,9% do total, cun incremento do 15,2% sobre igual mes do exercicio anterior.