A sensibilización sobre a doazón de órganos chega ao Hospital Provincial de Pontevedra a través dunha exposición que amosa o compromiso das novas xeracións con esta causa solidaria.
A mostra, que permanecerá aberta ata o vindeiro martes 10 de decembro, recolle os mellores traballos do VI Concurso de Carteis para Escolares sobre Doazón e Transplantes.
A iniciativa, promovida pola Axencia de Doazón de Órganos e Sangue (ADOS) xunto coas Consellerías de Sanidade e Educación, conseguiu mobilizar este ano a máis de 500 estudantes de 26 centros educativos procedentes de 18 concellos galegos.
En total, presentáronse 433 carteis e 28 curtametraxes, demostrando o crecente interese da mocidade por esta causa social.
O xerente da Área Sanitaria de Pontevedra e O Salnés, José Flores Arias, destacou durante a inauguración os froitos desta labor de sensibilización sinalando que durante o 2023 rexistráronse 109 doantes de órganos en Galicia, permitindo realizar 331 transplantes.
Ademais, subliñou que xa son arredor de 130.000 as persoas que dispoñen da tarxeta de doantes na comunidade, unha cifra que medra ano tras ano.
A exposición serviu tamén para premiar o talento local. Marina Prieto Sobral e a profesora Ana María Acuña Rodríguez, do CPR plurilingüe La Inmaculada de Marín, recibiron un recoñecemento especial polo seu traballo "Doar tamén é un xeito de amosar amor", galardoado co segundo premio na categoría de primeiro ciclo da ESO.
O acto inaugural contou coa presenza de numerosas autoridades, entre elas o alcalde de Pontevedra, Miguel Fernández Lores, e o presidente de ADROVI, Celso García Estévez, quen como receptor dun órgano destacou "a importancia de seguir traballando na sensibilización das persoas máis novas para crear unha conciencia social favorable ao xesto solidario da doazón".
Como novidade, presentouse un calendario que recolle os carteis premiados, unha iniciativa de ADROVI que servirá para difundir a mensaxe da doazón durante todo o ano.
A exposición, que xa visitou o Hospital do Salnés, continuará o seu percorrido por outros centros sanitarios da rede do Servizo Galego de Saúde.