O alcalde de Pontevedra, Miguel Anxo Fernández Lores, asegurou este xoves que "me alegro moitísimo" de que o PP non poña "liñas vermellas" á hora de negociar un posible apoio aos orzamentos municipais para 2025.
Celebra así que haxa un "espírito construtivo" para poder elaborar unhas contas que sexan "positivas" para Pontevedra e para as que espera contar co "máximo consenso posible".
Avanzou que o goberno municipal presentará mañá venres as "grandes cifras" deste novo orzamento que, segundo Fernández Lores, está "practicamente elaborado".
O atraso na súa tramitación, sostivo o alcalde, debeuse a "certas cuestións" alleas ao propio Concello, entre elas que o Estado aínda non definiu as transferencias, polo que "malamente podemos facer uns orzamentos definitivos".
En todo caso, co "esqueleto" do orzamento para 2025 na man, o goberno municipal sentará a negociar coa oposición. A prioridade será "indiscutiblemente" o PSOE, pero Lores agradece que o PP se abra a "facer propostas".
"Nós estamos abertos a incorporar certas cuestións porque nos interesa que o orzamento se faga co máximo consenso", reiterou o rexedor pontevedrés.
O "ánimo" do goberno municipal é aprobar estas contas para 2025, aínda que o alcalde considera que existe unha "base importante" que non existía o ano pasado, cando o orzamento viña prorrogado do ano anterior, o que dará unha marxe maior á negociación.
Fernández Lores avoga, en todo caso, por "non poñer o carro antes que os bois" e sentar a negociar e escoitar primeiro as propostas da oposición antes de pensar nun "plan B" para xestionar a política orzamentaria do Concello.