Unha cea para "celebrar Pontevedra". Con ese espírito o BNG agarda xuntar a unhas dúas mil persoas o próximo venres 17 de marzo, a partir das 21:30 horas, no Recinto Feiral. Será o acto que marcará o inicio formal da súa carreira de cara ás eleccións municipais de maio.
O alcalde, Miguel Anxo Fernández Lores, quixo desligar esta cea da precampaña electoral, asegurando que esta é unha das citas "que máis ilusión me fai nestes momentos", xa que estará acompañado dunha parte "importantísima" da sociedade pontevedresa.
"É unha cea na que queremos compartir moitas cousas con moitísima xente, compartir todo o que nos une de cara ao futuro e a paixón por Pontevedra", subliñou Fernández Lores, que destacou o "bo ambiente" que está a sentirse entre as persoas ás que están contactando para que acudan a esta cita.
Todos elas, destacou o rexedor pontevedrés na presentación desta cea, comparten tres características comúns: "o seu amor por Pontevedra, a confianza no futuro de Pontevedra e a de ter e compartir proxectos para que Pontevedra avance".
O BNG fai extensiva esta invitación a toda a veciñanza do municipio, que se poden poñer en contacto co partido, a través da súa sede comarcal, para anotarse para asistir ao evento, ao que acudirá, entre outras autoridades, a súa portavoz nacional, Ana Pontón.
Con respecto aos contactos para elaborar a candidatura coa que Lores tratará de revalidar a Alcaldía por sétimo mandato consecutivo, o alcalde só quixo adiantar que a lista que presenten os nacionalistas "será a mellor para que Pontevedra avance".