Ángeles Vázquez, conselleira de Medio Ambiente, Territorio e Vivenda, visitaba este sábado A Illa de Arousa para presentar a orde que establece os usos que se permiten no arquipélago dos Guidoiros e de Illa da Rúa. Por primeira vez, sinalou, regúlase o acceso diario tanto de embarcacións como de persoas a estes espazos.
A principal novidade céntrase en establecer un límite diario para o fonde de embarcacións como de visitas ao Illote de Areoso. En tempada alta, do 15 de maio ao 30 de setembro e en Semana Santa, permitiranse ata un máximo de 20 fondeos e 50 persoas por cada un das quendas de mañá e de tarde. En tempada baixa, o límite establécese en 10 fondeos e 20 persoas.
As visitas aos illotes deberán facerse, segundo a recomendación da Xunta, en grupos de non máis de 20 persoas, acompañadas dun guía, evitando a coincidencia dos grupos.
Regúlase a atracada de embarcacións relacionadas con actividades de uso público nos illotes. Deberá efectuarse sobre o medio litoral para preservar os hábitats e as especies. O número de autorizacións móvese entre 10 e 12 embarcacións por quenda atendendo a se a embarcación dispón de motor ou non en tempada alta. Durante a tempada baixa, o límite sitúase en cinco embarcacións por quenda.
Ademais establécese a prohibición de usos e actividades como a acampada, a caza e pesca recreativa ou deportiva; a recolección de especímenes e mostras biolóxicas, animais e plantas; a práctica de botellóns e o lume; o emprego de aparellos de son que perturben a tranquilidade do hábitat; e calquera modalidade de publicidade exterior.
Si se permite, entre outras actividades, o tránsito a pé na area terrestre; o mergullo en apnea sen pesas e o baño na modalidade de snorqueling. Tamén se poderán exercer accións recreativas ou culturais sempre que non alteren a conservación dos hábitats.
O documento someterase a información pública e audiencia aos interesados desde o martes 18 de outubro ata o 8 de novembro. A Xunta ten previsto que entre en vigor durante a Semana Santa de 2023.
Ángeles Vázquez estivo acompañada durante a visita por Carlos Iglesias, alcalde da Illa de Arousa e por representantes da organización de Produtores de Marisco e Cultivos mariños dá provincia de Pontevedra.