La Vuelta ciclista a España terá mascota pontevedresa. Unipublic ven de fichar a Mexi. Obviamente non se trata do futbolista arxentino do Futbol Club Barcelona senón dun molusco bivalvo que atende ao nome de Llón, Mexi-Llón.
A mascota é obra de Pepe Carreiro, pai dos Bolechas, e este luns foi presentada aos medios como "o mellor dos representantes das Rías Baixas: san, deportista e cen por cen galego".
Antes de quedarse con Mexi, houbo todo un proceso de selección no que quedaron descartados outros candidatos como unha gaivota, unha centola, vieira ata o albariño.
O director xeral de Unipublic, Javier Guillén, anunciou que no mes de xullo empezará a promoción deste "icono que enlaza con lo que quiere La Vuelta".