O Concello de Soutomaior, a través da concellería de Igualdade, presenta este Nadal un innovador programa de conciliación, o 'Espazo Concilia de Nadal', destinado a apoiar ás familias durante as vacacións escolares.
O programa, que se desenvolverá do 23 de decembro ao 3 de xaneiro no Centro de Benestar Integrado (Multiúsos), busca facilitar a conciliación da vida familiar e laboral durante este período festivo.
Este ano, o espazo de conciliación ofrece catro opcións horarias para adaptarse ás necesidades das familias: de 9 a 14 horas, de 8 a 14 horas, de 8 a 15 horas e de 9 a 15 horas.
Esta flexibilidade horaria permite ás familias escoller o horario que mellor se adapte ás súas circunstancias.
O programa está dirixido a crianzas de entre 3 e 11 anos empadroadas no municipio, e como novidade, tamén inclúe actividades específicas para mozos de 12 a 16 anos.
En total, ofrécense 50 prazas, que se asignarán en base a criterios de vulnerabilidade, como familias monomarentais ou parentais, vítimas de violencia de xénero, ou aquelas con rendas baixas, entre outros.
As inscricións abriranse o 26 de novembro ás 10:00 horas e permanecerán dispoñibles ata o 9 de decembro ás 14:00 horas, podendo realizarse a través da páxina web gabinetesoutomaior.com.
Para formalizar a inscrición, as familias deberán presentar documentación que acredite os criterios de vulnerabilidade, así como os DNI correspondentes e autorizacións para a toma de imaxes.
Este proxecto conta co apoio do Plan Corresponsables do Ministerio de Igualdade e da Xunta de Galicia.