A Garda Civil abriu unha investigación para aclarar a posible relación co narcotráfico dunha embarcación semirríxida e un tractor que foron abandonados en Noiteboa na costa de Vilanova de Arousa.
O subdelegado do Goberno en Pontevedra, Abel Losada, confirmou a existencia desta investigación e asegurou que, polo momento, non hai detidos.
Losada non quixo dar máis detalles sobre este operativo, que continúa aberto, para non prexudicar o labor dos investigadores.
A planadora, que ten tres potentes motores, foi precintada pola Garda Civil, segundo informa Diario de Arousa.
Apareceu na ensenada coñecida como Rego do Alcalde.
O tractor, pola súa banda, foi abandonado nunha zona inundable preto desta mesma ensenada.
Cando foi achado polas autoridades estaba enterrado no lodo, nunha área que queda cuberta pola auga cando sobe a marea.