A concellaría de limpeza viaria de Pontevedra, baixo a dirección de Xaquín Moreda, pon en marcha esta semana unha intervención especial de limpeza integral na rúa Xosé Malvar, que abranguerá ambas as marxes da vía.
Os traballos desenvolveranse na madrugada do xoves 2 de xaneiro, para o que se establecerá unha zona de prohibición de estacionamento durante as horas previas á actuación.
A área estará debidamente valada ao longo da semana para informar desta restrición.
Cómpre destacar que os vehículos que permanezan estacionados serán retirados polo guindastre municipal.
A operación de limpeza realizarase empregando máquinas varredoras e equipos de auga a presión, que actuarán tanto nas beirarrúas coma nas beiravías e na calzada.
Dende a concellaría solicítase a colaboración da veciñanza e dos condutores para garantir a efectividade dos traballos.
O departamento municipal pide desculpas polos posibles inconvenientes que poidan xurdir durante esta actuación, que forma parte das tarefas habituais de mantemento e limpeza da cidade.