Pontevedra está a vivir unha poda masiva das árbores situadas no centro urbano, dentro dun plan intensivo de mantemento.
Segundo informa o Concello, Blanco Porto, Cruz Gallástegui, Praza de San Xosé, Oliva, García Camba, Avenida de Vigo ou a Avenida de Bos Aires son os puntos nos que os operarios están a realizar traballos de poda e tamén de talla.
Nas últimas semanas a Concellería de Servizos Básicos Urbanos acometeu podas en exemplares de Cruz Gallástegui, Blanco Porto e os ficus de Castelao, uns traballos que se realizan para airear as copas e alongar a vida das árbores, ademais de para reducir os problemas que poden ocasionar as ramas aos veciños ao achegarse ás xanelas dos edificios.
Ademais podáronse as oliveiras da Rúa Oliva e a parte traseira do santuario da Peregrina, as camelias de García Camba e as magnolias da Praza de San Xosé.
Tamén se continuou coa eliminación de follas e ramas secas das palmeiras, en concreto cos exemplares da Avenida de Vigo.
Por último o Concello iniciou a talla de tres exemplares de plátanos da Avenida de Bos Aires, nas proximidades do Pavillón Universitario, ao tratarse de tres árbores secas ou con enfermidades que é necesario retirar por seguridade.
Esta talla empezou polo exemplar pegado ao pavillón, pero continuará o luns 22, martes 23 e mércores 24 de abril fronte ao centro educativo, o que provocará por unha banda a prohibición de uso do aparcadoiro exterior que alí se atopa e polo outra cortes puntuais ao tráfico dun dos carrís de circulación, o máis próximo aos edificios, en horario aproximado de 9:15 a 13:30 e de 15:00 a 18:30 horas.