O curso 2024-2025 será o segundo do alumnado de quinto curso de educación infantil no colexio A Xunqueira 2. Son o mesmo número, 24, pero as súas circunstancias son diferentes, pois este ano hai tres estudantes con necesidades educativas especiais, un máis que o pasado.
Son nenos de 3 e 4 anos e tanto o centro educativo como as súas familias levan desde xuño pedindo que se teña en conta a súa especial realidade e a "dificultade" de exercer unha docencia individualizada e coa mellor atención.
Como solución, piden que se desdobre a aula en dúas "para atender correctamente aos nosos fillos e fillas mellorando o principio de individualización da educación" e, en caso de non facelo, que envíen un docente de apoio a tempo completo.
A dous días do inicio do curso, este luns, todos coñeceron de primeira man a situación que terá a clase este curso. Confirmáronlles que non haberá desdobre e que se enviará un profesor ou profesora de reforzo a media xornada. Isto súmase a que tamén este ano hai un especialista menos en pedagoxía terapéutica no centro. Teñen tamén unha coidadora para todo o colexio, no que hai 12 alumnos con necesidades educativas.
Despois dunha primeira reunión de presentación cos profesores dos seus fillos, mantiveron un encontro os propios pais e nais. Nel, lograron unha posición "unánime" para facer todo o posible para cambiar esta situación.
Agora que todos están ao tanto, amosan a súa "indignación" e anuncian que "imos intentar esgotar todas as vías" para que as súas fillas e fillos teñen a mellor atención posible.
Pola tarde, un grupo destes pais e nais conversaron con PontevedraViva e explicaron os motivos que os levan a afirmar que están "moi moi indignados".
En xaneiro a Consellería de Educación aprobou unha resolución que establece unha nova valoración, a efectos de cómputo de ratios, dos nenos con necesidades educativas especiais. Nesta orde recóllese que os estudantes cunha discapacidade do 33 % computará como dous e os que teñan máis do 65%, como tres. Nesta aula, desta maneira, habería 28 prazas, por encima da ratio.
Non aplican esta nova resolución porque só se aplica para as novas matrículas e porque o terceiro alumno cunha necesidade educativa especial está aínda recentemente diagnosticado.
Estas cuestións técnicas indignan ás familias, pois "non sabemos cales son os criterios nos que se basean. Os criterios son números, non son nenos pequenos".
"Na inspección son contables e os números dan, pero esquécense de que tratan con persoíñas tan delicadas como son os nenos de 3 e 4 anos. A realidade non é só numérica, se non de atención de persoas que se moven, falan e se levantan das cadeiras", sinalan as familias.
Segundo explican as familias, o centro educativo leva pedindo o desdobre da aula dende antes de xuño a través de solicitudes á inspección, envío de informes, solicitude de coidadoras, envío informes médicos ou varias reunións presenciais de mestres que imparten docencia nesa aula coa inspectora co fin de expoñerlle a realidade da aula.
Eles seguirán loitando e queren reunirse coa inspección educativa, pois pensan que a solución dun profesor de reforzo a media xornada é "un parche".