Axentes da Policía Autonómica da sede de Pontevedra veñen de incautar 17,6 quilos de ameixa, tras un dispositivo de vixilancia levado a cabo na zona de Campelo e Combarro en colaboración con gardas rurais da Confraría de San Telmo.
Fontes oficiais da Consellería de Presidencia informaron que durante a vixilancia, os axentes observaron a dous varóns extraendo bivalvo de xeito furtivo.
Ao detectar a presenza policial, déronse á fuga e esconderon un saco que contiña a ameixa. Os axentes procederon a incautar ese saco, e devolver os bivalvos ao mar.
A extracción estaba a producirse de xeito ilegal, ao carecer de permiso ou autorización, e tiña ademais como destino final o consumo humano, o que supón un risco para a saúde das persoas.
O investigado acumula varios expedientes sancionadores por infraccións da Lei de Pesca de Galicia, con máis de 120 actos e máis de 1.300 quilos de ameixa.