Algo máis de 351.000 euros prevé destinar o Concello de Poio ao proxecto de humanización do lugar de Arén, na parroquia de Samieira, co que se quere poñer en valor o seu carácter tradicional. Será unha intervención financiada polo Plan Concellos da Deputación.
O obxectivo, segundo o concelleiro de Urbanismo, Gregorio Agís, é ampliar e mellorar os servizos básicos e a accesibilidade e mobilidade de todo este ámbito do municipio.
A memoria elaborada polos técnicos municipais subliña que os traballos servirán para ampliar unha zona que abarca os camiños de A Coita, Roeiro, Real de Arén e Souto de Arén.
"Estamos a falar dunha extensión importante, polo que é unha actuación que mellorará de xeito ostensible a mobilidade e a calidade de vida dun núcleo importante dentro da parroquia de Samieira", destaca Agís.
O proxecto dotará a esta contorna dunha nova superficie de empedrado na contorna máis tradicional, que facilitará o respecto coa contorna e a mellora da accesibilidade.
Ademais, tamén se procederá a dotar ás vivendas da zona de novas redes de abastecemento, saneamento e recollida de pluviais.
CONEXIÓN PADRÓN-CASALVITO
Por outra banda, o Concello de Poio aprobou o expediente para a contratación da redacción do proxecto de mellora na conexión entre os núcleos de Padrón e Casalvito.
Neste caso, os fondos para esta obra proveñen da liña de axudas da Rede Ágora, tamén da Deputación de Pontevedra.
Entre as melloras na zona, contémplase dotación dunha plataforma única, para garantir a mobilidade e accesibilidade e, ao mesmo tempo, poñer en valor a contorna.