Preto de 40 anos de historia ten ás súas costas o comedor social das Voluntarias da Caridade de San Vicente de Paúl, en Marín.
Un labor impagable ofrecendo comidas diarias a persoas que se atopan nunha situación de especial vulnerabilidade.
As comidas son preparadas e atendidas por dúas cociñeiras xunto a un grupo de voluntarias.
En total a instalación conta cunha capacidade de 80 prazas.
Para agradecer a dedicación dos implicados no seu funcionamento o comedor social foi visitado polo director xeral de Inclusión Social, Arturo Parrado, acompañado da alcaldesa de Marín, María Ramallo.
A Xunta de Galicia, sinalaron, colabora co seu mantemento achegando algo máis de 188.000 euros.
Trátase dunha axuda enmarcada na convocatoria de subvencións a entidades de iniciativa social para a promoción de actuacións de servizos sociais comunitarios e inclusión social para os anos 2023-2025.
Esta visita pretendía pór en valor o traballo diario das Voluntarias da Caridade de San Vicente de Paúl.