O alumnado de Bacharelato do Instituto Valle Inclán de Pontevedra estreou este luns as novas casetas auxiliares que de maneira provisional instaláronse como aulas no paseo de Montero Ríos mentres non termina a reforma que está en marcha neste centenario centro educativo.
A valoración maioritaria é positiva segundo puido comprobar o xefe territorial da Consellería de Educación, César Pérez nunha visita de inspección ás instalacións acompañado do director do IES, Daniel Mejuto, e o presidente da ANPA, Rubén Saavedra.
"Non tivemos queixas do profesorado nin do alumnado", celebraba o representante da Xunta.
Pérez Ares recolleu as peticións que lle fixeron, especialmente a necesidade de dar privacidade ás aulas para que non se vexa desde o exterior o que pasa nas clases. Para isto colocaranse uns vinilos e valórase instalar algún elemento que sirva de barreira para evitar as miradas curiosas.
O director do centro lembrou que xa se falou de instalar un peche perimetral, "pero este concepto parece que non era o mesmo para a empresa que para nós" xa que o profesorado demandaba outra solución "que daría certa intimidade para o alumnado, para que non se despistase e para que os viandantes non estiveran constantemente mirando".
Neste primeiro día tamén houbo problemas de conectividade coa Axencia para Modernización Tecnolóxica de Galicia (Amtega), e faltan algúns flocos como instalar un timbre na entrada ou uns felpudos así como cubrir cun teito de policarbonato os 154 metros cadrados da entrada para que os alumnos poidan realizar Educación Física.
Tamén o director do Valle-Inclán expresou a súa "satisfacción" admitindo que a posta en marcha desta medida provisional "dábanos un pouco de medo".
Daniel Mejuto tamén informou que xa está en marcha outra das fases da reforma, "agora van actuar na fase 1, nas aulas que dan acubillo a estas. Nesas aulas e nos departamentos temos que retirar material". Nesta tarefa unha empresa de mudanzas está a ocuparse de levar todo o material a un almacén.
O xefe terriotorial de educación lembrou que actividade lectiva nesas once casetas manterase ata finais de xuño, xa que o compromiso da Xunta co Concello de Pontevedra é que Montero Ríos estará liberado para as festas da Peregrina 2024.