O Concello de Soutomaior dá por rematadas as obras de ampliación do aparcadoiro situado na Avenida Xosé Solla, ao carón do Cruce de Pierres, en Arcade.
Esta actuación forma parte dunha estratexia máis ampla para solucionar os problemas de estacionamento no núcleo urbano.
O aparcadoiro conta agora con case 60 prazas gratuítas, segundo indica o goberno local.
Estableceuse unha regulación horaria de luns a sábado, entre as 8:00 e as 14:00 horas, cun tempo máximo de estacionamento de tres horas.
O alcalde, Manu Lourenzo, agradeceu aos veciños que cederan gratuitamente terreos colindantes para permitir a ampliación.
Agora, a intención do goberno municipal é habilitar, en total, máis de 100 novas prazas de aparcamento para resolver a demanda social.
A medida busca favorecer ao comercio local e mellorar a accesibilidade no núcleo urbano.
O rexedor destacou que esta ampliación "supón un paso de xigante para solucionar o problema de estacionamento que Arcade leva anos a vivir".
Ademais, sinalou que o Concello leva traballando desde o inicio do mandato en medidas para ordenar o tráfico, como a implantación da zona azul.
Lourenzo subliñou que "Soutomaior conta cun modelo de tráfico e de estacionamento moito máis calmado, accesible e afastado do feísmo urbanístico do que había ao comezo do mandato".
Non obstante, recoñece que aínda queda traballo por facer e que será necesaria a colaboración de todas as administracións para atender as necesidades que presenta Arcade.